ភ្នំពេញ៖ កម្លាំងនាយកដ្ឋាននគរបាលព្រហ្មទណ្ឌ ស្រាវជ្រាវបង្ក្រាបបានជនសង្ស័យម្នាក់ដែលធ្វើសកម្មភាព ឆក់ខ្សែក តែមិនបានសម្រេច នៅគល់ស្ពានស្ទឹងមានជ័យ។
កម្លាំងសមត្ថកិច្ចបានធ្វើការស្រាវជ្រាវនឹងបើកការស៊ើបអង្កេតកំណត់មុខសញ្ញាធ្វើការឃាត់ខ្លួន ជនសង្ស័យកម្នាក់ ឈ្មោះ គី តុងបី ភេទប្រុស អាយុ ១៧ឆ្នាំ ជនជាតិខ្មែរ នៅថ្ងៃទី២០ ខែកុម្ភៈ ឆ្នាំ២០២៤ ត្រង់ចំណុចផ្លូវលេខ៣៤៤ ក្នុងសង្កាត់បឹងសាឡាង ខណ្ឌទួលគោក។
ជនសង្ស័យបានសារភាពថា នៅថ្ងៃទី១៩ ខែកុម្ភៈ ឆ្នាំ២០២៤ វេលាម៉ោង ៥ល្ងាច ខ្លួន និងបក្ខពួកបានធ្វើសកម្មភាពឆក់ខ្សែកពីនារីរងគ្រោះកំពុងជិះម៉ូតូម្នាក់ឯង តែមិនបានសម្រេចនៅចំណុចផ្លូវលេខ២៧១ (គល់ស្ពានស្ទឹងមានជ័យ) ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
ជាមួយគ្នានេះ សមត្ថកិច្ចដកហូតសម្ភារៈបានរួមមាន ម៉ូតូម៉ាក ហុងដា-ស្កុបពី ពណ៌ខ្មៅ ពាក់ស្លាកលេខ ភ្នំពេញ 1GW-3927 (របស់ជនសង្ស័យ)។
បច្ចុប្បន្នជនសង្ស័យនិងវត្ថុតាងខាងលើ ការិយាល័យកំពុងកសាងសំណុំរឿង បញ្ជូនទៅអយ្យការអមសាលាដំបូងរាជធានីភ្នំពេញ៕
